ئەو ئەندامەی ئەنجومەنی پارێزگای سلێمانی بەڕوونی ئاماژە بۆ ئەوە دەكات كە پارێزگای سلێمانی لە رووی خزمەتگوزارییەوە تەواو فەرامۆشكراوە  ، هەروەها ئاماژەش بۆ ئەوە دەكات و دەڵێت: " دەسەڵاتی ئـیداری و مالی لەم بابەتەدا لای ئـەنجومەنی پارێزگاو پارێزگاریش نییە "

هەروەها (رێكەوت زەكی) مەترسی جێبەجێنەكردنی شەقامی (100)م  سلێمانی روون دەكاتەوەو دەڵێ: "بابەتی شەقامی ١٠٠ مەتری یەکێکە لەپرۆژە ستراتیژیەکانی شاری سلێمانی کەخزمەتی گەورە بەژێرخان و کەرتی گواستنەوەو ئـاوەدانی ئـەم شارە دەکات، بەڵام مخابن خەونی شەقامی بازنەیی ١٠٠ مەتری وا کورت دەکرێتەوە بۆ جوت سایدێکی ڕوتی بێ خزمەتگوزاری لەنێوان تاسڵوجە-عەربەت"

لێرەدا ئەو پرسیارە دێتە پێشێ ئەگەر (ئـەنجومەنی پارێزگاو پارێزگار) وەك باڵاترین دەسەڵاتی ئەم پارێزگایە دەسەڵاتی كارگێڕی و داراییان نەبێت. ئەی ئەم دەسەڵاتە لای كێییە؟ داهاتی ئەم پارێزگایە بۆچی خەرج دەكرێت و بۆ كوێ دەبرێت؟ كێ بەرپرسە لە ئیدارەدانی ئەم پارێزگایە؟ 

بۆیە زەحمەتە(وەیس)یش وەڵامێكی دڵخۆشكەرمان پێبدات چونكە ئەو لە هەڵبژاردنەكانی (2014)دا نە لیستی هەبوو، نەكاندیدیش بۆ ئەنجومەنی پارێزگا، بۆیە پێویستە تەنها نوێنەرانی هاووڵاتیان و دەنگپێدراوان فشارەكانیان چڕتر بكەنەوە  تا داهاتی ونبووی پڕۆژەكان بدۆزرێنەوەو لەخزمەتی هاووڵاتیاندا بخرێنە گەڕ.