(رێکخراوی کوردستان بۆ هەمووان) بەشداریکرد لە دووەمین پرۆسەی هاوشێوەی هەڵبژاردن

لەچوارچێوەی ئامادەکاریەکان بۆ ئەنجامدانی ھەڵبژاردنی خولی شەشەمی ئەنجومەنی نوێنەرانی عێراق٢٠٢٥، (رێکخراوی کوردستان بۆ هەمووان) بەشداریکرد لە دووەمین پرۆسەی هاوشێوەی هەڵبژاردن لە ئۆفیسی هەڵبژاردنەکانی سلێمانی و ناوەندەکانی تۆمارکردن.
بەمەبەستی تاقیکردنەوەی ئامێرەکانی دەنگدان، کۆمسیۆنی هەڵبژاردنەکانی سلێمانی  دووەمین پرۆسەی هاوشێوەی هەڵبژاردنی ئەنجامدا.
لە چوارچێوەی ئامادەکارییە تەکنیکییەکان بۆ ئامێرەکانی دەنگدان و سۆفت وێرو گواستنەوەی ئەنجامەکان لە ڕێگەی میدیای گواستنەوەوە، ئەمڕۆ پێنجشەممە ٢١ی ئابی ٢٠٢٥، دووەمین پرۆسەی هاوشێوەی هەڵبژاردن لە ئۆفیسی هەڵبژاردنەکانی سلێمانی و ناوەندەکانی تۆمارکردن بەڕێوەچوو.
هاوکات سەرۆکی ئیدارەی هەڵبژاردنەکان لە ڕێگەی فەرمانگەی ئەلیکترۆنییەوە چاودێری پرۆسەکەیان دەکرد، کە لە ئۆفیسی هەڵبژاردنەکانی پارێزگاکان و ژمارەیەک ناوەندی تۆمارکردن ئەنجامدرا. پرۆسەی ھاوشێوەکردنەکە بە ئامادەبوونی چاودێران و ھاوبەشانی ھەڵبژاردن ئەنجامدرا.
ستافی کۆمسیۆن لە بنکەکانی دەنگدان دەنگیان دا و ژماردنەوەی دەستی و ڕیزکردنی سەرجەم دەنگەکانیان ئەنجامدا.
شایانی باسە کە کۆمسیۆن پێش هەر پرۆسەیەکی هەڵبژاردن کۆمەڵێک پرۆسەی هاوشێوەی هەڵبژاردن ڕێکدەخات بۆ دەنگدانی تایبەت و گشتی، هەروەها ژماردن و ڕیزکردنی دەستی، بۆ دەستنیشانکردن و ڕاستکردنەوەی هەڵەکان، ئەگەر هەبن.